طارم ، نه گورملي سن
ناركيمين درمَلي سن
بير چپرلي باغ كيمين
گيزلينجه گيرملي سن
***
مين ايللردي ياشارسن
دورد فصليده باهارسن
آغ قرمزي اوزون وار
دييه سن ،نازلي يارسن
***
جنته بنزر ،باغين
مارال مكاني، داغين
زيتون دن كوينگين وار
قرمز نار، ياناقين
***
گوزللرين، باشي سن
هندوستان قارداشي سن
زنجان قزل اوزيكدور
سنده اونون قاشي سن
***
سفره ن، چوخ بركتلي
اوشاقلارين ، همتلي
داغلارين، چوخ گورملي
باغلارين، سخاوتلي
***
ياشيل،گوي،قرمزي سن
گوزللرين گوزي سن
قديمكي دوستوخ سنه
گوزدن آتما بيزي سن
***
آخشاملار كند آراسي
يورولماقين چاراسي
آغاشلار آراسيندن
گورسَنر آي پاراسي
***
تنديردن تازه چورك
چيخسا ،دايانماز اورك
اوينار زيتون آغاجي
يئل گلسه ،نازلي يارتك
***
چالار داوار جَرَسي
چوبان اوجالدار سسي
اورگينين قوشونا
آزجا آچار قفسي
***
دومان ياتوب دره ده
جيران لار داغ پره ده
سوتون ساقان قويونلار
يورقون ياتار بره ده
***
چايدا، بولاخلار سسي
باغدا، اوراخلار سسي
آغاجلارا يئل دَيَر
وئرر تاراخلار سسي
***
باغدا بلبل ساز چالار
عاشقين صبرين آلار
انسان ده بلبل كيمين
اوچوب گدر، آد قالار
***
موسوي نين گوزي سن
شعري،عشقي،سوزي سن
بير روح سيز كي بدنده
گوزل طارم ، اوزي سن
سراينده : سيد حسين موسوي
