سندستان داغونون باشی اوجادیر
دومان گلسه گۆنوزوده گئجه دیر
چۏپان سسلر یۏلداش حالون نئجه دیر
ککلیک اۏخور داشلاردا چن آلتوندا
گۆلاب تک سو آخار چمن آلتوندا
گؤزل سندستانوم چمنلی یوردوم
جاوانلوق فصلینی من سنده سۆردوم
گؤزل دسته گۆل لر دؤشلرده دردوم
هر یانا باخارسان چمن دیر سودور
چمنده اۏتلیان قۏیون قوزو دور
قیزلار دسته دسته تره دررلر
سئون اۏغلانلاری یاده سالارلار
آه چکیبن اۏدلی یار یار دئیرلر
هر کس سنه گلسه دردی تزّه لر
سئودیگی گؤزلی سنده یاد ائلر
دؤشلرده گؤگریب گؤی تره لرین
یارپوز، پونه، سبز ائدیب دره لرین
الوان اۏلوب گۆلدن پاک سره لرین
دۆزلرین چمندیر نه قدر باخسان
طبیعتینده یۏخ بیر ذرّه نقصان
یۏوشان دیبیندن اوچار قازالاخ
هر یانه باخارسان چمندیر بولاخ
بلبل لر چیچکه سالوبلار یۏلاخ
چۏخ صفالی چۏخ گؤزل سن سندستان
دۆزلرین چمندیر داغون گلستان
اوشاقلار وورارلار تۏپی هر یانه
جئیران تک قاچارلار اۏ یان بو یانه
قیزاروب اۆزلری دؤنوبدور قانه
بسلییب سندستان هواسی بئله
گۆل ایچینده گزیب اۏخشارلار گۆله
اوشاقلوقده خان داشونه چیخردیک
اۏ اوجادان اۏبالاره باخاردیک
شوخلوق ائدیب ییخیلردیک ییخردیک
داهی اۏ گۆن بیرده بیزه ال وئرمز
قدرین بیلین کئچن گۆن دالی گلمز
بیزدن سلام سنده دۆشن ائل لره
یاشیل چمن لره ساری گۆل لره
گؤزل آدون سالام گرک دیل لره
حیف سن سن بئله گیزلین ده قالان
گیزلین گؤگریبن گیزلین سارالان
قوزئی دره لرده قارون قالوبدی
اریییب سو دره یه یۏل سالوبدی
جوربه جور گۆل تره دۆزون آلوبدی
وحشی ریحان اۏخشار یارون تئلینه
بیردفعه اۏخشارسان تازه گلینه
نعنا ککلیک اۏتو دؤشلری آلوب
چۏپان سسی داغا ولوله سالوب
اۏ گؤزل منظره جانیمی آلوب
وقت اۏلئیدی بیرده سنده دۆشئیدیم
دۏست لارونان چمنده اگلشئیدیم
دره لر دؤره سی یارپوز باغلییب
وحشی لاله اؤز اۆرگین داغلییب
هر گؤزل یارونه بوسه ساخلییب
گؤزون تیکیب باخار سره یۏلونه
چکر الین تاراخ وورموش تئلینه
قره چادور لارون صف دۆزولوبدور
تسبیح کیمین بیربیردن اۆزولوبدور
شۏر سولاری چادر دان سۆزولوبدور
قۏنشو قۏنشو سۆت دییشیک ائدرلر
هردن ییغیشیب بیر ائوه گئدرلر
سنده اردیبهشت چۏخ گؤزل اۏلار
گۆل لر هئی آچولار غنچیه دۏلار
دۏغرودان عاشقین قرارون آلار
اۏ گۆل لر بلبل لر بولاخ لار چمن
یورد لاردا گؤگرن وحشی یاسمن
کله سنگه چیخسان طارم گؤرسنیر
طارم دیمه هر نه واروم گؤرسنیر
منیم آتا بابام یاروم گؤرسنیر
وار آرزوم سنه بیر جاده دۆشه
گؤزل طارم آباد قاله همیشه
آوازیان چایونون سوئی آخار
بو داشدان اۏ داشا اؤزونی ییخار
گاه چوخوره گاه ده اوجایا چیخار
گؤزل آبشارون دائم وار اۏلسون
سنی خار ائلیه ن اؤزی خار اۏلسون
قۏیون داشوندا بیز قۏیون یویاروق
دۏستلارونان داوار کسیب ییه روق
شادلوق ائدوب لطیفه لر دیه روق
سس سالاندا قۏیون داشی سسلنیر
قوزولار یایولوب یاخشی بسلنیر
پینتیلیق دۆزونده مادیانلار اۏتلار
کؤکلوقدن ائله بیل صاغریسی چاتلار
چمن اتگینده ییخیلیب آغنار
سنبل لی اۏتلاری یئل خیشیللادور
اۏتون قدی بیر متردن اوجادور
وحشی خاشخاش گۆلی قیزاردوب دؤشی
قوزی بعی سسلدیر داغی داشی
قازانلاردا قینیر آغجه باش آشی
چۏخ لذیذ دیر آغجه باشون تره سی
آغجه باشدان دۏلوب صالای دره سی
صالای دره سینده اوشقون چۏخ اۏلار
ترش و شیرین خیار کیمی شاق اۏلار
گلیب گئدن دریب سۏغات آپارار
یاخشی یئملیک سۏغالاقون وار سنین
قاطر شلّاقون وار شکردن شیرین
نعنا تۆکلوجه ن دیر سانجی درمانی
گۆل لی معجر تره آلوب هر یانی
گۆل چیچکدن داغون داشون الوانی
بزنمیش اۏخشارسان تازه گلینه
تئلینه گۆل وورموش حنا الینه
کوآکک تره سی یا قره یارپاق
قیز گلین دررلر دؤشلرده قیبراق
الله فرصت وئره داماغ اۏلا چاق
کوآکک قۏقّازون تؤکه سن آشه
سۆت آشی قازانده قینیه داشه
هر نه وار دیر سنده تمام انتیکدیر
دست قدرت گۆل چمنین اکیبدیر
سنه چۏخ گؤزللیک الله وئریبدیر
حئیف اۏلسون داهی بیزلر قۏجالدوق
تنبل اۏلوب دۆشوب طارمدا قالدوق
گؤزل سندستانوم ریحانلی داغوم
گدیکلر اۆستونده چیچک لی باغوم
یادومه دۆشنده جوانلوق چاقوم
اۆرگیم چالوشور گؤرم بیر سنی
سنده بیر قوجاقان آلاسان منی
کاسه لی چایونون کامه چاشوردی
یایولومده کورلار قۏیونی قوردی
گؤبه لک دۏنبالان وئرر ائل یوردی
ایچملی سویی وار اۏ یان بولاقون
ییمه لی دیر سنین قیماقون یاغون
جوانلوق قدرینی بیلین جوانلار
جوانلوقی داغه داشه یایانلار
جوانلوق ده آدام سؤزی گئج آنلار
گئتدی الدن داهی عمرون بهاری
باسدی بیزی قۏجالوقون غباری
الان من اۏخشارام ائل کؤچموش داغه
دالی گئتمیش گله بیلمم قاباغه
یواش یواش دورانمارام ایاقه
سینّیم کئچدی جوانلوقوم هئچ اۏلدی
بیجا یئره منیم عمروم قورتولدی
آی سندستان گۆلون آچولان وقتده
قازالاخ لوعادان اوچولان وقتده
قار سویونده قوملار سئچیلن وقتده
وقت اۏلئیدی بیرده سنه گلئیدیم
جوانلوق فصلینی یاده سالئیدیم
آی سندستان قارلارون اریه نده
ساری گۆل لر چمنی بوریه نده
مه بو داغدان اۏ داغا سۆریه نده
وقت اۏلئیدی بیر ده سنه گلئیدیم
جوانلوق عالمین یاده سالئیدیم
آی سندستان بولودون آغلیانده
شره یئلی داشلارون داغلیانده
بولاقلار دوره سی گؤی باغلیانده
وقت اۏلئیدی بیر ده سنه گلئیدیم
جوانلوق عالمین یاده سالئیدیم
آی سندستان قۏیونلار معلشنده
سۆتلر قازانلاره دۏلوب داشانده
اوشاقلار چمنده معلّق آشانده
وقت اۏلئیدی بیر ده سنه گلئیدیم
جوانلوق عالمین یاده سالئیدیم
آی سندستان تره لرین چیخانده
قارین اتگینده سولار آخانده
آهو گؤزلی قیزلار اۏنه باخانده
وقت اۏلئیدی بیر ده سنه گلئیدیم
جوانلوق عالمین یاده سالئیدیم
آی سندستان آی ایشیقی اۏلانده
چیک چیک قوشی اوچوب جیک جیک سالانده
آنالار اوشاقه لای لای چالانده
وقت اۏلئیدی بیر ده سنه گلئیدیم
جوانلوق عالمین یاده سالئیدیم
آی سندستان چادرلار قورولانده
سۆرولرین یاتاقدان سۆرولنده
تۏپ آغاجی مئیداندا وورولانده
وقت اۏلئیدی بیر ده سنه گلئیدیم
جوانلوق فصلینی یاده سالئیدیم
آی سندستان قوزولار قاروشانده
قرقی لر دۏلانوب داغی آشانده
بولود گورولدیوب دۏلی دۆشنده
وقت اۏلئیدی بیر ده سنه گلئیدیم
جوانلوق فصلینی یاده سالئیدیم
آی سندستان چۏپان لار های سالانده
گئچی لر زنگ لرین قییم چالانده
قۏچلار دؤیوشونده دالدا قالانده
وقت اۏلئیدی بیر ده سنه گلئیدیم
جوانلوق فصلینی یاده سالئیدیم
آی سندستان سحر تئز آچولانده
گئجه چمن اۆستده قیرۏو سالانده
برزگرلر هامی کتدن گلنده
وقت اۏلئیدی بیر ده سنه گلئیدیم
جوانلوق فصلینی یاده سالئیدیم
آی سندستان سنده گۆنلریم کئچدی
عمرومون گۆنلری قوش کیمی اوچدی
اوشاقلوق دۏره سی یادیمه دۆشدی
گلیر کئچیر بیربه بیر نظریمدن
نئیلوم امّا هئچ نه گلمز الیمدن
یۏلداش یۏلداش تۏپ آغاجی اۏیناردوق
دسته دسته قاروشاردوق قایناردوق
کۆس بَه کۆس اۏلانده جۆت دایاناردوق
نئجه قاچاردوق یئتیشک بیز کۆسه
لاچین ایستیر ائله بیل قوشی باسه
اویدوم اویدوم اۏیناردوق بیز اویاردوق
اۏیناماقدان الله مگه دۏیاردوق
داغه داشه هر یانه اۆز قۏیاردوق
نه یاخشی دور اوشاقلوقون زمانی
حسابه گتیرمز یاخشی یامانی
سرباز اۏیونی اۏیناردوق قاچاردوق
هردن ووروب باتلاقلاردان گئچردوق
سوسوزاردوق بولاقدان سو ایچردوق
آت کیمی چاپاردوق اۏیان بویانه
قۏیمازدوق بیر لحظه بیری دایانه
آخشاملار گئدردیک ایستی تندیره
یار و یۏلداش ییغیشردیق بیر یئره
نقیل دیه ردی هر کس اؤزونه گؤره
آخ نه شیرین یاپوشاردی اۏ سؤزلر
عین اۏ صحنه نی گؤرردیک بیزلر
قۏن قۏن دییب پروانه لر توتاردوق
قانادلارون یۏلوب یئره آتاردوق
چککولگه دن قۏیون ائدیب ساتاردوق
قرنچه دن ایت ائدردیق سۆرویه
قۏیونی وئرردیق اۏندان اؤرویه(چرای شبانه)
گئدیب الدن داهی اۏ یاخشی دۏران
قۏجالوب رفیق لر یۏلداشلار بو سان
ائشیت بو سؤزلری ای عاقل جوان
باخما گیلن مسخره یلن قۏجایه
سنده بیر گۆن گله جاقسان بورایه
سعادتدور جوان پرهیزکار اۏلا
اؤزوندن عاجزه یاخشی یار اۏلا
اخلاقی خۏش اۏلا خۏش رفتار اۏلا
الله ین یۏلوندان هئچوقت چیخمیا
شیطانی ایشلره هرگز باخمیا
جوانلوقده خدمت ائدین آنایه
اؤلکیه وطنه دۏسته آتایه
جوانلوقده عبادت ائت خدایه
قۏی گئتمه سین جوانلوقون الیندن
الله آدی هئچ دۆشمه سین دیلیندن
اۏغول سنه واروم بیر وصیّتیم
اۆرگیم میوه سی آرزوم عزّتیم
اگر سن ساخلوران منیم حۆرمتیم
ناحقّه قۏل قۏیما هئچ وقت دۆنیاده
مظلومه کمک اۏل دشمن بیداده
یالان دیمه اۏغول دۆنیاده هرگز
یالان بیر چادور دور میخسیز درک سیز(بی ستون)
یالان دیه ن قالار آخیر کمک سیز
یالانچی دیر، سؤز گزدیرن بدبخت دیر
دنیا آخرتده گۆنلری سخت دیر
عمل-شیطاندور قماره باخما
اؤز الینلن ووروب ائوی وی ییخما
قازاندوقون مفته باشونا چیخما
مالون گئدر آبرون گئدر هئچ قالماز
آخیر گۆنده بدبخت دیر قمار باز
استاد شهریاره وئردیق سلامی
گؤندریر سلطانی بئله پیامی
قیمته گلمز استادون کلامی
سندستاندان حیدربابایه سلام
قورتاردوم سؤزومی داهی والسّلام
---------------------------
مرحوم امان اله سلطانیhttp://mayssamin.blogfa.com
