گوزل طارمه سلام
گوزل طارم ، گوزل نار باغلارین وار !
گوزل کهلیک ، ماراللی داغلارین وار
مروّتلی ، مومن اوشاقلارین وار
گوزل طارم سیندیرمه هئچ اورگی !
داش ایلمه هئچ طاباخده چورگی
قزل اوزن تک قزل اوزیگین وار
خرمنه سر تک گورملی گوزل غار
کجر کیمین اوجه بویلی نازلی یار
نارگوزلی، زیتون اورکلی ،شاه یاشا
یایدا کولگه،قیشدا پناهگاه ، یاشا
باهاردا گول لنب گوزل لنرسن
خسیسلیقین آغاجیندن انرسن
یوخسوللوخدن اربابلیقه دونرسن
چورک وئرن ، دریا اورک ، اربابیم !
اوزی گولش، گوللی اتک، اربابیم !
بایرام گونی اوشاق ، بویوک شاد اولار
آغیزلارده محبتدن داد اولار
اورکلر کهنه غمدن آزاد اولار
بایرامسیز یوخلی قویما ائوده یاتا
مردمی شاد گوره، غملری آرتا
باهارین قانی اوینار رگلرینده
جنت تک باغلارین گولر سرینده
گیلانکشه گولر، صومه برینده
همیشه باغلارین دولی نار اولسون
دوشمنین دونیاده گرفتار اولسون
یایده سخاوتین اوجه یتیشر
انجیر،اوزوم ،فندق،گوجه یتیشر
نادان اولانلار چوخ یی یب چرپیشر
گوزل طارم سن سیز گورمه سین گوزوم !
اورکده عشقیم سن، دوداخده سوزیم
توی آخشامی کتده گلین چیخنده
بگ بیر اوجه دامدن آلما سیخنده
اوشاقلار بیر بیرین یره ییخنده
آرزیلارچرپینار ،جانیم آلیشار
اورک سازینده کی سیملر قاریشار
عاشیقلرین شاد نغمه لر چالنده
یاره اورکلری اله آلنده
غریبی، کرمی یاده سالنده
منیم ده بیر سینن قلبیم یاد اولسون
اوره گیزین ائولری آباد اولسون
حیالی،قز،گلین،اوغلانلارین وار
شرفلی برزگر،چوپانلارین وار
طراوتلی گوزل بستانلارین وار
عداوت ،کینه،محنت،بی ثمردی
بو دونیا یولدی انسان رهگذردی
گوزل طارم دونیانین یوخ وفاسی !
بو بیرحمین یوخدی آتا،آناسی
جوانلار اولدورماخدن یوخ هراسی
وفاسیز،حیاسیز،ظالمدی دونیا
بو جورنامرد اولاننان یولداش اولما
گوزل طارم کومک سیزه،کومک اول !
باقلی قالان سفره لرده چورک اول
نامردلرین یاره سینده ، نمک اول
دونیاده بیر یاخچی ، بیر یامان قالار
نه قوجا، نه اوشاق، نه جوان قالار
قویمییاخ قوروسن محبت باغی
آرامیزده دوشه آیریلیق داغی
اورکلرده گچه عشقین چراغی
اورکلری سیله قین کینه لردن
حرص آغاجین قوپاردخ سینه لردن
گوزل طارم فقیرین گوز یاشین سیل !
دردینی سنه دئمه میش اوزین بیل
یاقیشلی پر بار اول، عزتلی هر ایل
سخاوتدن بولاخلاردن دولوب داش
دی هانسی آجی آخر توخ ائدیب داش؟
گوزل طارم دوستی ، دوشمنه ساتما !
قرانلوقده ،آرپه، بوغده یه قاتما
گجه سئل گلسه نامردی اویاتما
هلاکتدی ظالملرین جزاسی
توی اولار مظلوملاریچون عزاسی
صفالی ، گوللی صومعه بر دی کندیم
رگیمده قان اودی، آغزیمده قندیم
اوره وابسته ی هر بند بندیم
همیشه روحیم اوردا،جانیم اوردا
اوره گیم اوردا دی، ایمانیم اوردا
اورکده خاطیره لر تازه لندی
جانیمده داش اولن شّکر الندی
آلاردیم قشقیرنده باشه کندی
گه اوی نییب ،گه الشن گونلریم
هر گون بیر آغاشدن، دوشن گونلریم
قیش قیش ، توپ آغاجی ، گیزلن پاچ
قیشی گوتردن دایانما تز قاچ
گیزلنب دیردخ دای گوزلرین آچ
گرتیکان اوتوزدرنده آغلاردیخ
گرتیکان اوتانی داشه باغلاردیخ
آغاشدن آغاشلاره دیرماشاردیخ
ایش برک اولنده آغ یالی آشاردیخ
غم ، غصه سیز،دییب،گولوب یاشاردیخ
نه تز منی قویوب گتدین اوشاقلیق
زندگی ده حیران اتدین اوشاقلیق
گزردیخ باغلاری سیزده بدرده
اویناریخ آغ یالده، شوره بکلرده
دمبالان تاپاردیخ ، تاپده ، دوزلرده
گوزل کندیم بایرام اولسون، توی اولسون
اورکلرین محبتیله دولسون
هزاررودین یاشیل کوینکلی کندی
نارلری ارزشدن سالوبدی قندی
دریا اورکلری چورک وئرندی
شفیعی لر،شریفی لر یاد اولسون
اورکلری کی دونیاده شاد اولسون
زهتر آباد باغلاری ، پاسار چایی
بهشته اوخشییار لذتلی یایی
سرین لیقده ، صفاده یوخدی تایی
سلام اولسون شرافتلی ائلیوه
شکر اتماقی جاری ائله دیلیوه
دونیا بیزی ساتوب،تورپاخ آلاجاخ
یاخچی بشر اورکلرده قالاجاخ
نامردی حق الله، اوته سالاجاخ
زندگانلیق بیر سرعتلی قطاردی
تا کپریک وورسن عمرین قوتاردی
یر اوزینده ، وارلی چوخدی،انسان یوخ
تسبیح سویه چکن لرده، ایمان یوخ
انسانلر شیطان اولالی شیطان یوخ
قوجالماخ ایمان گتیرمز انسانه
چوخ قالماخدن آباد اولماز ویرانه
گوزل طارم گوزل لیخده آدین وار !
بهشتی میوه لردن هر زادین وار
منیم تک غم داغینده فرهادین وار
عزیزایرانیچون هندوستان سن
او غیرتلی، شرفلی تنده ، جان سن
گوزل طارم ظرافتلی غزل سن !
منیم شعریم شکر اولسا،عسل سن
بو ایران ایچره، معشوق ازل سن
خزان سیز گورملی، گویچک باهاریم
امیدیم،عشقیم،عمریم،اعتباریم
گوزل طارم شرفده سلطانیم سن !
اورکده افتخار، رگده قانیم سن
دوداخده سوزلریم، تنده جانیم سن
غزلسن موسوی نین سوزلرینده
آنا یوردوم، ایشیق سن گوزلرینده
سراینده : سید حسین موسوی
توضیحات:
قزل اوزن= رود قزل اوزن
خرمنه سر: غاری در روستای ده بهار طارم
کجر: کوه بلند پشت روستای گیلانکشه ی طارم
گیلانکشه، پاسار، هزاررود، صومعه بر، زهترآباد= نام چند روستای طارم
شوره بک = نام چمنزار طبیعی در صومعه بر
آغ یال = نام کوهی در صومعه بر
